भगबती चौधरी

समाजसेवी तथा आर्थिक अभियान्ता स्वर्गीय दिनेश चौधरीको स्मृतिमा दिनेश चौधरी स्मृति प्रतिष्ठानले प्राविधिक शिक्षा हासिल गर्न चाहने युवाहरुलाई लक्षित गर्दै कलेज सञ्चालनमा ल्याएको हो । दुहवी इनरुवा लाइनमा रहेको कलेजमा यो वर्ष डिप्लोमा सिभिल इन्जिनियरिङ र डिप्लोमा इन एग्रिकल्चरको पढाई हुने छ । आउँदा वर्षहरुमा कलेजले अन्य विषयहरु पनि थप गर्ने छ ।

दुहवी, ४ भदौ । सुनसरीको दुहवी नगरपालिकामा दिनेश चौधरी स्मृति पोलिटेक्निक इन्ष्टिच्युट सञ्चालनमा आएको छ । प्राविधिक शिक्षा तथा व्यवसायिक तालिम परिषद् (सिटिइभिटी) बाट सम्बन्धन प्राप्त यस कलेजमा डिप्लोमा इन सिभिल इन्जिनियरिङ र डिप्लोमा इन एग्रिकल्चरको पढाई हुन्छ ।

समाजसेवी तथा आर्थिक अभियान्ता स्वर्गीय दिनेश चौधरीको स्मृतिमा दिनेश चौधरी स्मृति प्रतिष्ठानले प्राविधिक शिक्षा हासिल गर्न चाहने युवाहरुलाई लक्षित गर्दै कलेज सञ्चालनमा ल्याएको हो । दुहवी इनरुवा लाइनमा रहेको कलेजमा यो वर्ष डिप्लोमा सिभिल इन्जिनियरिङ र डिप्लोमा इन एग्रिकल्चरको पढाई हुने छ । आउँदा वर्षहरुमा कलेजले अन्य विषयहरु पनि थप गर्ने छ ।

चौधरी स्मृति पोलिटेक्निक इन्ष्टिच्युटले यो वर्ष दुई विषयमा भर्ना समेत खुलाएको छ । इन्ष्टिच्युटका अनुसार यो वर्ष डिप्लोमा इन सिभिल इन्जिनियरिङमा ४८ तथा डिप्लोमा इन एग्रिकल्चरमा ४० जना विद्यार्थीका लागि भर्ना खुलाइएको छ । तीन वर्षको उक्त विषय अध्ययनका लागि कलेजले सिभिल इन्जिनियरिङमा २ लाख तथा एग्रिकल्चरमा १ लाख ९० हजार शुल्क निर्धारण गरेको छ । साथै, उक्त विषयमा अध्ययन गर्न चाहने जेहन्दार विद्यार्थीहरुको लागि विभिन्न छात्रबृत्तिहरु समेत रहेको प्रतिष्ठानका अध्यक्ष द्रव्यराज चौधरीले बताए ।

इन्ष्टिच्युटले दुई विषयमा १४ जनालाई सिटिइभिटी अन्तरगत छात्रबृत्ति छुट्याएको इन्ष्टिच्युटका फोकल पर्सन बबिता लेखीले बताइन् । अत्याधुनिक विषयगत प्रयोगात्मक ल्याब, अनुभवी विषयगत प्राध्यापकहरुद्वारा प्राध्यापन, सुविधासम्पन्न भौतिक पूर्वाधार तथा अन्तिम सेमेष्टरका विद्यार्थीहरुलाई जव प्लेसमेन्टका लागि समेत पहल गर्ने भनिएको छ ।

आर्थिक सशक्तिकरणकी अभियान्ता, समाजसेवी, राजनीतिकर्मी भगवती चौधरी दिनेश चौधरी स्मृति प्रतिष्ठानकी संरक्षक हुन् । गरिब, विपन्न वर्गका नागरिकका छोराछोरीलाई सर्वसुलभ रुपमा प्राविधिक शिक्षा प्रदान गर्ने हेतूले कलेज सञ्चालनमा ल्याइएको संरक्षक चौधरीले बताइन् ।

प्रतिष्ठानले दुहवीमै विपन्न तथा आर्थिक, सामाजिक कारणले विद्यालयसम्म पहुँच नपुगेका नागरिकका बालबालिकाहरुका लागि निःशुल्क आधारभूत विद्यालय समेत सञ्चालन गरिरहेको छ ।